صفحه 37 از 57: « پیشین 1 ... 36 37 38 ... 56 57 پسین »

اشعار ترکی

banoo

کاربر

ارسالها: 1683

#361 Posted: 14 Mar 2013 12:28

مندن کوسنلرین بیریده سن اول ...
مندن کوسنلرین بیریده سن اول

بوراخ اللریمی قوی یادا قالسین

قیش کیمی ، قار کیمی ، آغ قوشلار کیمی

سنسیزلیک گونلریم کؤکسومه دالسین
دئمیرم "سئو" کی سن سئومه یه جکسن

بیلیرم ، چوخداندیر داشا دؤنوبسن

وئردییین سؤزلرین آلتیندان قاچیب

یا سئوگی خیالمیش یا سن چؤنوبسن ؟
منیم دوننلریم سنه بزندی

سنین بو گونلرین کیمه پای اولوب ؟

بیر چیچک اکمیشدیم آخار ساچینا

بیلمیرم او چیچک هایاندا سولوب ؟
منیم کئچمیشیمی قایتارانمادین

بو گوناه بیر عؤمور سنله قالاجاق

سعادت قوشودا چیینینه قونسا

قارغالار حایفیمی سندن آلاجاق
مندن کوسنلرین بیریده سن اول

من اؤزوم دونیادان کوسولویم ، بیل

گؤز یاشین بیر داها منی یاخانماز

سیزلاما ، آغلاما ، گؤز یاشینی سیل ...
(بابک قوجازاده)

banoo

کاربر

ارسالها: 1683

#362 Posted: 14 Mar 2013 12:29

دوغوم گونومون مناسبتینه
بیر ایلده کؤهنه لدی اؤز شکیللریم

بیر ایل ده تبریزدن تئز آیریلاجاغام

بیر ایل ده سنسیزلیک اینجیتدی منی ...

بیر گونده خاطیره قاطارینا قوشولاجاغام

ماوی گؤیلردن اؤتوشن دورنالار کیمی

سنین آزمانیندان سوووشاجاغام ...

گؤزلریم شاه گؤلونده قالسادا بئله

اللریم قیشیندا دونماق ایسته سه ده

آیاقلاریمسا ، گولوستان باغی نین داشلارین نیسگیل ائتسه ده

سندن آیریلاجاغام

بیر گونده ماهنی لاردا اوخوناجاغام

من سندن دویمادیم کی هئچ

قوجاغینین ایستیسیندن

بوروق بوروق کوچه لریندن

بیر شهر بویدا سندن آیریلاجاغام ...

بیر گون وارامسا بیر گونسه یوخام

ایسته رم هر زامان من سنه باخام

سنی سئومه ینلری یاندیرام ، یاخام

یئتر کی سن یاشا هر زامان تبریز

banoo

کاربر

ارسالها: 1683

#363 Posted: 14 Mar 2013 12:31

سئوگی حسرتی ...
" بیر کیلو سوغان آل ، بیر کیلو خییار

گلنده چؤرک ده یادیندا اولسون !

او دؤنه آلدیغین پنیر شور ایدی

فیکرین پنیرلرین دادیندا اولسون ! "
منیم ده قسمتیم بئله گتیردی

ایندیسه گونده لیک یاشاماقدایام

طالعیم بیر واراق کاغاذا باغلی

هردن ائولنمکده ، بوشاماقدایام
ائله بیل سئوگی ده یاشلا قوجالیر

زامان اؤته – اؤته اورک داش اولور

هردن او کئچمیشدن منیم قسمتیم

گؤزومدن سوزولن دامجی – یاش اولور
هئچ ایندی پاییز دا خوش گلمیر منه

یارپاقلار خش ـ خشی نه ییمه گرک ؟

آرتیق ماهنی لاردا ، دؤشومه یاتمیر

تیتره ییب ، برکیییب ، داش اولوب اورک
اؤزومو کئچمیشده ایتیرمیشم من

بو گونه بیر دیری جنازه م گلیب

زامانین نئشتری سانجیر بئینیمی

سنینسه خاطیرن فیکریمی دلیب
ایندی نه سئوگی وار نه ده محبت

هامیسی ائولیلیک قایدالاریدیر

ائوی سهمانلاییب ، یئمک پیشیرمک

بو قیزین منیم چون فایدالاریدیر
حئییف کی سن یوخسان ، بو گون یانیمدا

سنه یوخ ، بیر دامجی سئوگی یه محتاج

اوخشاییر یاشامیم بیر اینسانا کی

هر زامان توخ قارین ، هئی گؤزلری آج
ایندیسه ماشین دا ائوه گئدیرم

الیمده بیر کیلو سوغانلا خییار

بیر آز چؤرک آلیب بیر آزدا پنیر

هله لیک نیسگیلیم ، آی ایستکلی یار !

banoo

کاربر

ارسالها: 1683

#364 Posted: 14 Mar 2013 12:32

من سندن دویمورام ، دویمارام بیر آن ...
هردن اؤزومدن ده دویورام یامان

من سندن دویمورام ، دویمارام بیر آن

سنه اؤیره نیرم زامان به زامان

من سندن دویمورام ، دویمارام بیر آن

سنین خاطیرنله یاشاماقدایام

قوپوز چالماقدایام ، داغ آشماقدایام

سنین چون هر نه یی بوشاماقدایام

من سندن دویمورام ، دویمارام بیر آن

هردن اوره ییمی قیریب ـ اویارسان

هردن گؤزلریمی یولدا قویارسان

سن منی اونودوب ، مندن دویارسان

من سندن دویمورام ، دویمارام بیر آن

banoo

کاربر

ارسالها: 1683

#365 Posted: 14 Mar 2013 12:33

چکه جکدیر ...
یوخسان بو گئجه ، گؤیده گؤزوم آی چکه جکدیر

شبنم لره گؤز اینجی لرین تــــــــــای چکه جکدیر

بئزمیش بو کؤنول ، آیریلیغـــــا یوخ داها صبری

قیشقیرتی سالیب ، سندن اوزاق های چکه جکدیر

سیزلار اوره ییمــــــــده اوخونون کؤهنه یاراسی

ظالیم قیزی بیــــرده دایانیب یــــــای چکه جکدیر

من اؤیله بیلیردیم بو ایشیــــــن آخیری خوش دور

ظن ائتمز ایدیم آیریلیغـــــی پـــــــای چکه جکدیر

هردن گورو ـ گوپباز گؤزونون کئفلی سی یم من

هردنده دوروب خاطیره لــــــر سای چکه جکدیر

بابک نه اولار باشدان ائله سئــــودانی ـ یـــــاری

یوخسا اوره یین یالقیز اولوب وای چکه جکــدیر

banoo

کاربر

ارسالها: 1683

#366 Posted: 14 Mar 2013 12:35

اوغلوم
تقدیم به جوان شهیدانی که بعد از سالها فراق فقط چند تکه استخوان برای مادرانشان هدیه فرستادند

منطیق لره یئرلشمــــــز اینان صبر و قراریــــم

ایللردی سنی آختاریرام سئوگیلی یاریــــــــم

گل گؤر کی نئجه سنسیزم آی گوللو باهاریم

خوش گلمیسن آی جبهه لرین یورغونو اوغلــــوم

گل اولدو آنان باغچالارین سولغونو اوغلــــــــوم

اؤلدوردو بیزی نس فلکین مین بیر اداســـی

طاقچامدا یئتیم قالدی تویون قانلی حنــاسی

سندن سونرا یوخدور ائویمین بیرده صفاسی

خوش گلمیسن آی جبهه لرین یورغونو اوغلــــوم

گل اولدو آنان باغچالارین سولغونو اوغلــــــــوم

دوشموشدو گؤزل بوی بوخونون یادیما بیردن

قوندو بو کدر تورپاغـــی هر زادیمـــــا بیردن

چاتدی چوروین سور ـ سومویون دادیما بیردن

خوش گلمیسن آی جبهه لرین یورغونو اوغلــــوم

گل اولدو آنان باغچالارین سولغونو اوغلــــــــوم

بوندان سونرا سنله یاتارام سنلـــه ده دوررام

هر صبح آچیلینجا گلرم حالیوی ســـوررام

مین آددیما غیرتسیز اولان یوللاری یوررام

خوش گلمیسن آی جبهه لرین یورغونو اوغلــــوم

گل اولدو آنان باغچالارین سولغونو اوغلــــــــوم

banoo

کاربر

ارسالها: 1683

#367 Posted: 14 Mar 2013 12:35

سنسیز ...
یوخ ایدین دونن ده داریخدیم آخشام

تک من یوخ سنسیزلیک تبریزی سیخیر

دووارلار داش اولسا بتن دان اولسا

آیریلیق ائویمی هر آخشام ییخیر !...

بلکه ده نه بیلیم دونن قارغالار

گولوستان باغینین داشین آتدیلار

گؤرورسن ؟ سنین تک بو قارغالاردا

وطنی غربته اوجوز ساتدیلار

دئمیرم منیم اول دئمیرم سئو منی

آنجاق گؤزلرینی قییما هئچ کسه

نه اولار ، یایلیقی باشیندان آچما

دؤزمه رم یئللرده ساچین دا اسه

بلکه ده قاتمیشام ، بوراخ بونلاری

شاعیرین دلی ینن هئچ فرقی یوخدور

سانما کی سنین چون بو شعری یازدیم

یازدیغیم شئعیرلر یاشیمدان چوخ دور ...

banoo

کاربر

ارسالها: 1683

#368 Posted: 19 Jun 2013 17:19

باياتيلار
عزيزيم درده مرديم،
دوشمه سين درده مرديم.
منه درمان نئيله سين؟
طيفيلکن درد امرديم.

باياتيلار! سؤزه عنبر قاتيلار،
داماريمدا نبض کيمي آتيلار.
باياتي نين آتشيندن، اودوندان
اورگيمده نئچه تونقال چاتيلار.

باياتيلار! سينه داغي، گؤز داغي،
محبتين توستولنن اوجاغي.
بير ميلتين کيمليگيني بيلديرن،
نفه سيندن لپلنن بايراغي!

باياتي نين بوياسينا بويانديم،
سؤز - قيبلمدير، سؤز - عشقيمدير، سؤز آنديم.
باياتي نين تيلسيمينه دوشونجه
واللاه شاعير اؤلدوغوما اوتانديم.

banoo

کاربر

ارسالها: 1683

#369 Posted: 19 Jun 2013 17:21

بايراق
تورپاغيم اوستونه کؤلگه لر سالان
منيم وارليغيمين جيلاسي-بايراق.
ظفردن دوغولموش

گؤي تورکدن قالان

قورد باشلي بايراغين بالاسي بايراق.

اوچ رنگلي بايراغين کؤلگه سينده من

قاراجا تورپاغي وطن گؤرموشم.

ظفر گوللريني دؤوري-قديمدن

بايراق ايشيغيندا بيتن گؤرموشم.

بايراق منليگيمدير، بايراق کيمليگيم،

بايراق-اؤز يوردوما اؤز حاکيمليگيم.

هاردا اجداديمين آياق ايزي وار،

بو ظفر بايراغيم اوردا ديکلسين.

کئچديگي يئرلرده داغلار، ياماجلار

اونون حوزورونا سالاما گلسين.

تاريخدن قديمدير، زاماندان قوجا

منيم بايراغيما سانجيلان هيلال.

عالمه نور ساچدي تاريخ بويونجا

معبدلر باشما تاج اولان هيلال.

دايم اوجالاسان! ساواش گونونده

عسگر سيلاهييلا سني تن گؤروم.

يالنيز ظفر چالميش شهيد اؤنونده

سني آلقيش اوچون اَييلن گؤروم.

banoo

کاربر

ارسالها: 1683

#370 Posted: 19 Jun 2013 17:21

"سليمان رستم"

او قدر ناله ائتديم كي قيزاردي لاله تك باغريم

باخيب اؤز دؤورمه گوردوم قرنفيل، ياسمن ياندي

قونوب آسوده داملاردا، اوتور هيبتله بايقوشلار

الينده حقي بايراق ائيله ين، دوز يول گئدن ياندي

اوره كده مين ياران واردير، يازيق ميللت، يازيق ميللت

سنه هر لحظه ده اوز جانيني قربان ائدن ياندي

دولوبدور نملي زندانلار، يانير اودلاردا آزادليق

نچون دينميرسن آي قارداش، سوروش بير گور ندن ياندي

دوروبدور باشيم اوستونده، الينده خنجري جلاد

نه گول قالدي نده بولبول، باغ ياندي چمن ياندي

ياديمدان چيخدي بولبول تك، قفسده گوللرين رنگي

غمين، دردين اليندن اود توتوب آخر بدن ياندي

سليمان، غافيل اولما، ياخشي باخ اطرافه، شاعير سن

جنايت آشدي حديندن، هاراي سال كي: وطن ياندي!

صفحه 37 از 57: « پیشین 1 ... 36 37 38 ... 56 57 پسین »

شعر و ادبیات /

اشعار ترکی

برای دسترسی به این قسمت میبایست عضو انجمن شوید. درصورتیکه هم اکنون عضو انجمن هستید با استفاده از نام کاربری و کلمه عبور وارد انجمن شوید. در صورتیکه عضو نیستید با استفاده از این قسمت عضو شوید.

↑ بالا