صفحه 40 از 57: « پیشین 1 ... 39 40 41 ... 56 57 پسین »

اشعار ترکی

banoo

کاربر

ارسالها: 1683

#391 Posted: 19 Jun 2013 17:53

سن نظردن سالماسایدین، ای هلال ابرو منی،

دام عشقه بونجا سالمازدی یئتن مهرو منی

گوز یاشیم آخدیقجا، آرتار سوزِ عشقیم سینه‌ده،

یوخدیر امیدیم، خلاص ائتسین بو اوددان سو منی

اینجه‌لوب زولفون خیالی‌له وجودیم، اویله کیم،

تارِ زولفوندن حساب ائیلر گــوره‌ن بیر مومنی

بیلمه‌دیم، قیلدیم نظر اول زولـفِ عنبر فامینه،

سحرله سالدی کمنده نرگسِ جادو منی،

مجلسِ می‌ده نگاریم آچدی مشکین زولفونی

بیلمه‌دیم مئی نشئه‌سی مست ائتدی، یا کیم بو منی!

مـن اسیـر زولفونم، آنجاق جمالین سئومیشم

فکر قیلما، ایستـه‌ییر وصلمدن اُوتری بو منی

گورمه‌ینجه گول اوزون، واحد، او شهلا گوزلونون

ساکت ائتمه‌ز نه چمن سیری، نه بیر آهو منی

شاعر: علی آقا واحد

banoo

کاربر

ارسالها: 1683

#392 Posted: 19 Jun 2013 17:54

یارین ره عشقین‌ده کونول قان اولا، خوش‌دیر

هیجرین‌ده گوزوم هر گئجه گریان اولا، خوش‌دیر

من کی، بو قارا گوزلولر عشقینده اسیرم،

سینم هدف ناوک مژگان اولا، خوش‌دیر

سن عصری‌میزین ایندی زلیخاسی‌سن، ای گول!

عاشق سنه مین یوسف کنعان اولا، خوش‌دیر

ییغما، باشینا، نازایله بیر شانه چک هر دم

کونلوم کیمی، زولفون‌ده پریشان اولا، خوش‌دیر

آچ سینه‌نی گوستر منه هر صبح زمانی،

گول بولبول ایچون چاک گریبان اولا، خوش‌دیر

رخسارین اودی کونلومی یاخدیقجا سئویننم

پروانه یوز ئیل شمع‌ایله سوزان اولا، خوش‌دیر

جانان نه جفا ایله‌سه، واحد، یئنه صبر ائت!

عشق اهلی اسیر غم جانان اولا، خوش‌دیر

شاعر: علی آقا واحد

banoo

کاربر

ارسالها: 1683

#393 Posted: 19 Jun 2013 17:54

لبین‌ده عاشقه اولسایدی استفاده یئری

قدح‌ده قانه دونوب قالمازایدی باده یئری

دیار عشقه کونول، لااُبالی قویما قدم

بو بارگاهه گئدرکن، بیر اعتقاده یئری

اراده سیزلره یئر یوخدو عشق مولکون‌ده

خوشا اول عاشقه‌وار اوندا بیر اراده یئری

شراب مجلسینه قویمایین گله‌ن‌ده رقیب

ده‌گیل بو گوشه‌ی جنت حرام‌زاده یئری

سنین گؤزل‌لیگی‌نین عاجزم اِفاده‌سینه

ملک‌دن اوزگه‌سـنه تاپمادیم اِفاده یئری

تکبر اهلینی عشق ایچره ایسته‌مز جانان

طریق عشقه کونول، دائماً فتاده یئری

دیار عشقده واحد، هامی برابر دیر

بیلین‌مز اوردا گدا ایله شاهزاده یئری

شاعر: علی آقا واحد

banoo

کاربر

ارسالها: 1683

#394 Posted: 19 Jun 2013 17:54

چوخ گوزه‌للر گوردوم آختاردیم بوتون دونیانی من

تاپمادیم عالمده اوز کونلوم سئون جانانی من

بی‌نوا پروانه‌لر تک یئتمه‌دیم مقصودیما

عشق سوداسیله یاندیردیم بو شیرین جانی من

نازنین، آهو باخیشلی چوخ پری‌لر گورموشم

سئومه‌دیم اوز سئوگیلیمدن باشقا بیر جیرانی من

بولبول نالانی‌یم من بیر گول اوزلی دلبرین

نیلره‌م هر لاله اوزلی غنچه‌ی خندانی من

هر گولون بیر عطری وار هر غنچه‌نین بیر نشئه‌سی

اولموشام چوخ نازنین‌لر باغی‌نین باغبانی من

وار امیدیم وصل جانانه یئتیشسین تئز الیم

آهیله سوندوررم آخر آتش هجرانی من

«واحدم» بیمار عشقم غیردن یوخ منتیم

دردیمه جانان الیله ائیله‌رم درمانی من

شاعر: واحـد

banoo

کاربر

ارسالها: 1683

#395 Posted: 19 Jun 2013 17:55

زینبیم نهر فرات اوسته سپهداریم ئولوب

کسیلوب قوللاری غیرتلی علمداریم ئولوب

قره معجر باشووا باغلا باجی

گئت اوتور قارداشووا آغلا باجی

یارالار سینه سینون اوسته گلستان کیمیدی

او قدر اوخ توخانوب جسمی نیستان کیمیدی

گوزلروندن ایراق اولسون او قدر داش وورولوب

پیکری شان شان اولوب زلف پریشان کیمیدی

قره معجر باشووا باغلا باجی

گئت اوتور قارداشووا آغلا باجی

داش دگوب آلنینا گل صورتینه قان توکولوب

ساحل معرفته فکر ایله مرجان توکولوب

آیریلوب عضولری قارداشیمون پیکردن

ایله بیل آیه به آیه یره قرآن توکولوب

قره معجر باشووا باغلا باجی

گئت اوتور قارداشووا آغلا باجی

باشا چیخماز بیلورم باجی بلاسی باشیمون

ئولمینجک قوروماز چشمه‌لری گوز یاشیمون

مین ائیل عمریم اگر اولسا سویا حسرت باخارام

سو کنارینده سوسوز جانی چیخوب قارداشیمون

قره معجر باشووا باغلا باجی

گئت اوتور قارداشووا آغلا باجی

لایق شانی ابوالفضلیمه غم بزمی قورون

گیینوز قاره ادبلن دیزی اوسته اوتورون

آناسی ام بنینون عوضینده ملشون

سینه‌سی پارچالان قارداشیما سینه وورون

قره معجر باشووا باغلا باجی

گئت اوتور قارداشووا آغلا باجی

باشین آلدیم سینمین اوسته دیدیم جان قارداش

قیزلاریم گوزلروون قانینه قربان قارداش

گوردوم آهسته دیور آی گوزیمون نوری حسین

ئولورم باشیمون اوسته اوخی قرآن قارداش

قره معجر باشووا باغلا باجی

گئت اوتور قارداشووا آغلا باجی

دیدیم آچ گوزلرووی وصلوه حسرت چکورم

او گوزل گوزلرووه باخماقا منت چکورم

ممکن اولسا دیدی سنده گوزووی باغلا حسین

یوزیمه باخما الیم بوشدی خجالت چکورم

قره معجر باشووا باغلا باجی

گئت اوتور قارداشووا آغلا باجی

آغلیوب یاره لنن قلبیمی یارما ئولورم

گوز یاشیلان بو بیابانی سووارما ئولورم

سنی ویرّم قسم اللرده ئولن فاطمیه

منی اکبر کیمی اخیامه آپارما ئولورم

قره معجر باشووا باغلا باجی

گئت اوتور قارداشووا آغلا باجی

قلم اولسیدی یازاردیم علمون سینه سینه

سوزلریم اود توکه اهل حرمون سینه سینه

گوردی دشمن منی قولسوز باشیما وردی عمود

یوزی اوستونده یخلدیم ننمون سینه سینه

قره معجر باشووا باغلا باجی

گئت اوتور قارداشووا آغلا باجی

شاعر: غفاری اردبیلی

banoo

کاربر

ارسالها: 1683

#396 Posted: 19 Jun 2013 17:56

آز قالدی کی دعواده یتسون خطر عباسه

قان گوزلرینی دوتموش وئرمور خبر عباسه

قوللار قلم اولموشدی قان گوزلره دولموشدی

آغلاردی مدارینده شمس و قمر عباسه

صاق گئتدی کسر گئتدی صول گئتدی سپر گئتدی

باش کاسه‌سی اولموشدی تنها سپر عباسه

دورت سمتدن اوخ دگدی بیر آخ دئمدی والله

دیل یاره‌لری اولدی اوخدان بتر عباسه

کسدی قباقین ناگه بیر غول قوی پیکر

بیر آهن عمود آلتدا سالدی نظر عباسه

سسلندی، علی اوغلی نه گلدی او قوللاره

بو سوز یارالاردان چوخ، ائتدی اثر عباسه

ناگه او عمود آهن گزدی باشی اوستونده

جان جان دئدی زهراده والا گهر عباسه

زین اوسته ابوالفضلی بیر صاق صولا ترپتدی

لایلای چالینور گویا شوریده سر عباسه

بو واقعه واللّهی زهرایه گران گلدی

یر گوی هامی قان آغلار دشمن گولر عباسه

شاعر: استاد منزوی

banoo

کاربر

ارسالها: 1683

#397 Posted: 19 Jun 2013 17:56

علی سینمده کی دیرناق یاراسی خاطرینه

بیر آزدا یات سحرون ماجراسی خاطرینه

سوسوزلار الده سو جامی دیلینده یا عباس

دخیل درگه اولوبلار سخاسی خاطرینه

سوسوزلارین چوخی دائم بو دور و برده گزور

گچولّه صاق صولا سو ماجراسی خاطرینه

خیال ایدولّه سو اولسا فقط بو خیمه‌ده وار

سویی ربابه ویرللر بالاسی خاطرینه

اوغول بو سوزلره باعث فقط سوسوزلقدی

همیشه درد سیزیلدار دواسی خاطرینه

خجالتی سنون عباس عمون چکور آرادا

گیدوب اوزاقدا گزور ئوز حیاسی خاطرینه

فقط رقیّه باجوندور گلوب گیدن یانوا

ئوزین هلاک ایدور ئوز دلرباسی خاطرینه

و بیرده سس اوجالاندا گلولّه عمّه‌لرون

توکولّه گوزیاشی قارداش بالاسی خاطرینه

گرگ سکینه‌نون آغوشینه ویرم سنی‌ده

دخیل درگه ایده ئوز آناسی خاطرینه

دیه عمو آنامون چاره‌سی گیدوب الدن

گوزین تیکوب الوه التماسی خاطرینه

او خالی مشک‌لره دقّتیله بیر باخسان

و لو اولا ایکی قطره شفاسی خاطرینه

توکک بوغازینه راحت گیدوب گله نفسی

ربابون آه دل بینواسی خاطرینه

بالق تک آغزوی تزتز آچوب چخاتما دیلون

ئورگیمون بو ساغالماز یاراسی خاطرینه

من آلتی آی سنه صود ویرممیش غذا یمدیم

باغشلا بو گجه نی غم هواسی خاطرینه

یقین فراتیده ناله ایدور سوسوزلقوا

یاتانموسن او فراتون صداسی خاطرینه

فرات سهلیدی داغ داش یانار سنون حالوا

بو لشگرون عمل نارواسی خاطرینه

چوخ ایستورم آنالار ایچره تک رباب آنووی

بیر امتحان ایده‌لر، مدّعاسی خاطرینه

گوزوم پیاله سینه بیر پیاله سو ویره‌لر

ویرم بو گوزلروی عمرون بقاسی خاطرینه

شاعر: استاد منزوی

banoo

کاربر

ارسالها: 1683

#398 Posted: 19 Jun 2013 17:57

خلایقدن جفا گوردوم تماماً بی‌وفا گوردوم

وفاسیز آشنالردن عجائب ماجرا گوردوم

اولارکی لاف یک‌رنگی ووروب آخر دو رنگ اولدی

تمام اقربالر عقرب اولدی جان‌گزا گوردوم

کیمه بیل باغلادیم قطع اولدی امیدیم بلیم سیندی

فقط بیر آشنا عقرباده تک خدا گوردوم

فقط بیر تخم مرغی ساده و یکرنگ بیلمیشدیم

اونوندا کوینگین رد ایلدیم رنگین دو تا گوردوم

جهاندا قورخما دشمنن همیشه آشنادن قورخ

نه اینکه اشنانون حیله و مکرین خفا گوردوم

الونن اوپسه آلانما چکر آخر ایاقونن

سو اوپسه پای دیواره ییخیب ویران سرا گوردوم

زلیخا ایستمیردی یوسفی اوز نفسین ایستیردی

حامی اوز نفسینین محبوبیدور دنیانی لا گوردوم

صمیمیت محبت عشق بازی ایتده کاملدی

بو حیوانین وفاسین راه حقه آشنا گوردوم

شاعر: منعم

banoo

کاربر

ارسالها: 1683

#399 Posted: 19 Jun 2013 17:59

مجنونون آدی ائیله کی دیل ده‌ن دیله دوشدی

گوردی قالا بیلمیر داخی چول ده‌ن چوله دوشدی

بیر گول وار ایدی دوره چمنزار ایدی زیبا

آقشام چاغی گلدی او گوزه‌ل منزله دوشدی

گون باتدی غم آرتدی چولون آهولاری یاتدی

خول‌لار باشین اگدی او قده‌ر چلچله دوشدی

چرخین قارالان چهره‌سی کوکب‌له بزه‌ن‌دی

رخسار سیاهه ائله بیل آبله دوشدی

اسدی او بیابان ده بیر باد غم‌انگیز

غم‌لر بورویوب آتش عشقی دیله دوشدی

صبح اولدی چمن گولدی شتر زنگی چالیندی

گلدی گولون اطرافینه بیر قافله دوشدی

اگلشدی‌له باهم دئدی‌لر وای بو نه حال دی

نیلیم دئدی دوران دولانیب ایش بئله دوشدی

سوز دوندی دانیشدی بیری پول‌دان بیری مال‌دان

مجنونه آجیق گلدی بو سوزلر گله دوشدی

دوندی دئدی پول صحبتی عمری هدر ائیلر

اولدوزکی گوره‌رسوز پولوز ال ده‌ن اله دوشدی

بیر سوز دانیشون کی ایکی دنیالره دگسین

بیرکیم دئمه‌سین کی بو سوزوز نافله دوشدی

هر لحظه دانیشساز دانیشین لیلی سوزونده‌ن

گولشنده گوروم بولبولوم هانسی گوله دوشدی

هر گون باخارام عکسینه آئینه‌ی دل ده

صد حیف اولا مابین‌یمیزه فاصله دوشدی

عشّاق وطن جبهه‌ده غرق اولدی لا قانه

منعم وطن آواره سی چول ده‌ن چوله دوشدی

شاعر: منعم

banoo

کاربر

ارسالها: 1683

#400 Posted: 19 Jun 2013 18:01

دوشموش معنبر سنبلون خورشید تابان اوستونه

شول رسمله مشکین بنین گلبرگ خندان اوستونه

رخسارین اوزره زلفونی هر کیمسه کیم، گوردی دئدی

باخین بو کفری کیم نئجه، داغیلمیش ایمان اوستونه

کونلومی ویران ائیلرم، مهرین یئرین جان ائیلرم

عشقین منه شان ائیلرم، دوشدی غمین جان اوستونه

یاقوت‌له ریحان خطین، ای قوت جان، شکر لبین

شول رسمه کیم دوشموش دورور خضر آب حیوان اوستونه

نور تجلّی سرّنی گور دی یوزونده گوزلریم

گورکیم، نه صورت باغلامیش بو چشم گریان اوستونه

درد محبت عاشقه درمان یئتر، وار، ای حکیم

هر دم منه مین دردیلن آرتیرما درمان اوستونه

عشقینده ای جان و جهان، گر چه نسیمی خاک اولور

دورموش سنینله تا ابد اول عهد و پیمان اوستونه

شاعر: نسیمی

صفحه 40 از 57: « پیشین 1 ... 39 40 41 ... 56 57 پسین »

شعر و ادبیات /

اشعار ترکی

برای دسترسی به این قسمت میبایست عضو انجمن شوید. درصورتیکه هم اکنون عضو انجمن هستید با استفاده از نام کاربری و کلمه عبور وارد انجمن شوید. در صورتیکه عضو نیستید با استفاده از این قسمت عضو شوید.

↑ بالا